Ishangekwagh y

Hegen se nger ishangekwagh y. Man her ne ua nenge vough er i hii ve se ver anikav sha asangeakaa i man sha asangeakaa j yô: gadia aluer u ver anikav sha ityough i akpelan ahar a ishangekwagh y yô, ishangekwagh y la ia gema ia hingir ij fese fese. Ka kwagh u kpilighyol tsô!

Er i ngeren ishangekwagh ne yô, ka nahan. U za sha peese, shin a agee, maa u kpela ikpelan i kiriki i fese u due vough er u zua a hwange u shin yô, u za hemen u kenden sha jighilaa, tsô u hide u za shin jighilaa, u nger ishangekwagh j. Maa u gema, tsô u kpela ikpelan i kiriki i fese jighilaa u due, sha u ngeren ishangekwagh igen i i dondo.

Nahan ishangekwagh j i ken ishangekwagh y i ken inja i asangeakaa her ne yô, hwange na u zaan sha peese la ngu gemen gemen. Gba u a lu jighilaa. Man er m ôr yô, gba u a hemba zaan shin a er a lu her ne. Nahan nger un una hemba zaan shin, gadia aluer a hemba zaan shin yô, a hemba doon ashe. Ishe you ia ôr u shighe u a kuma er i doo u yô. Aluer a za shin kpishi kpishi yô, alaghga una lu er kwagh u kpilighyol kpeghee, kpa alaghga ua soo un. Kpa aluer a za shin kpeghee tsô yô, a doo ashe ga.

Nahan se nger ishangekwagh y. Nger nongo u asangeakaa y, nger takerada môm cii nahan, zan zan u fatyô u ngeren ve vough. Time sha mi u nenge wer ityough i asangeakaa y cii i kuma sha ijiir môm yô. Nahan i hiihii man i sha uhar la: ityough i hanma ishangekwagh ken ahar ne gba u kuman sha ijiir môm.

Ka kwagh u ka a eren ior kpishi nahan: aluer u ngu ngeren yô, kwagh u u nger ken ijime la ka a hingir kiriki a hemba kwagh u u hii a mi la. Kwagh ne ka a er ior kpishi mba ve lu henen ngeren yô. M tese mbahenen kpishi kpishi ngeren, man m nenge wer kwagh ne ka a er hanma shighe hanma shighe. Nahan m ngu kaan u kwagh ne hegen, sha er ua kura iyol yô.

Ken ikav i tesen ne, i i dugh ken washika u ayange a tse ne, ua nenge asangeakaa y atar, man ua nenge wer ve za shin ve hemba asangeakaa y a ken ikav i tesen i se lu a mi ne yô. Man ua nenge wer môm ken a ve, u a lu sha, hen uwegh ku yanegh la, za shin vough, nyôr ken hwange u ngeren u a lu shin la. Kwagh ne doo vough, ican ngi ga. Man ka ikav i tesen i dedoo i ishangekwagh y, hemban cii u hiihii u a lu sha la. Inja na doo. Nahan nenge sha mi, ua nenge er ngeren u inja ne ka a lu yô.

Takerada u karen ngeren 13