Eleetera j

Saana, vano ninrowa olepa eleetera j. Vano, nthoonyeryo ori ohoolo waa ti wa enamuna ya ileetera, khahiyo olepa ni ntata. Nto kinrowa ohimya itthu vakhaani wiira nilokihe, okhala wiira khahiyo wooreera ntoko onoowerya aya okhala.

Nto ninnipacerya ntoko naapacenrye ahu vapacereryo tthiri tthiri. Ninnipaka osulu wooveya, vathi ni ikuru, ntoko naapanke ahu nihinatthi wiixutta eleetera i. Masi nuumala, ninnivikaniha okhuruwa vathi. Nave onoowerya okhuruwa vathi vanceene. Onoowerya okhuruwa vathi ovikana eliinya emosa paahi. Tthiri, onaphwanela okhuruwa vathi ovikana eliinya emosa. Vakhala wiira khahiyo siiso, eleetera ela khenoneya yooreera. Weyo mwaneene onoowerya woona moota enireera aya. Masi vakhala wiira ti yookhuveya vanceene, enniwoneya yookhuveya ni yoohireera, ntoko mu nthoonyeryo ola. Enaphwanela okhuruwa vathi vanceene ovikana.

Nto ninnipaka osulu wooveya, ninnikhuruwa vathi, ntoko ekalawa enitthimaka vathi va maasi enikhuruwa mmaasini a ephareya. Vano wuupuwele, iliinya sinirowa vathi sinnikhuruwa ntoko ekalawa enitthimaka vathi va maasi, nave atthu anceene annipaka iliinya iyo sookhuveya vanceene. Ti wooreera opaka soolapuwa.

Nto ninnipaka ekottoopa, nave ninnivenya osulu. Vano, oramma wa ekottoopa mu nthoonyeryo, owo ti woohiloka: ekottoopa ele khenivenya osulu mookololowa ntoko enaphwanela aya. Enaphwanela okhala ni oramma woolikanana ni eliinya enirowa osulu ya eleetera i. Okhala wiira etthu ninrowa ahu opaka ti olepa eleetera j, nto mowaakuveya nuumala ninnilepa eleetera i. Nave onrowa woona wiira oramma wa eliinya enirowa osulu ya eleetera j onaphwanela okhala woolikanana ni oramma onipacerya eleetera j, vakhala wiira onnisuwela etthu kinihimya aka. Oramma wootheene onaphwanela olikanana.

Nto weererye olepa eliinya emosa ya ileetera j. Opake soolapuwa ntoko onaphavela aa, masi sootheene sikhale ni olapuwa woolikanana.

Ikwaha ikina, vaavo onilepa aa olepa woophitaanya ileetera, onaphwanela orukunuxa olapuwa wa itthu, okhala wiira ileetera sinnikhuruwa vathi ni okhunela ileetera siri vathi vaya. Masi okathi atthu yaalepa aya olepa woophitaanya ileetera, yaanixanka vakhaani paahi ni eyo, nave yaanihakalala ileetera okhuruwa vathi va eliinya mpakha ophiya eliinya ya ileetera onilepa aa vathi vaya, nave yaaniwerya osoma saana. Nto ohixanke ni eyo. Itthu sootheene sinrowa osomeya saana, hata eyo eniiraneya.

Ola ti nthoonyeryo wa etthu yeele kaahimya aka, wa Sir Christopher Wren, yoowo aalepale moota ekerexa yuulupale St Paul's Cathedral ya London yaarowa aya otekiwa. Nave ntoko onoona aa, iliinya sinirowa vathi sa ileetera saya sikina ti soolapuwa vanceene. Nave tho, weha wiira nipuro eriyari ya iliinya ti nuulupale vanceene. Nipuro nlo ti ntoko nuulupale ikwaha piili. Nave eyo, ti woonaneya, ennipaka wiira epaphelo ela aalempe awe ekhale yooveya vanceene osoma.

Nave atthu yaanilepa vapaphelo yoohirina iliinya, nave ikwaha ikina yaaniheliha epaphelo erina iliinya vathi vaya, wiira iliinya iyo sooneyeke vakhaani, aahiiso yaanilepa paahi ahirina iliinya, okhala wiira nuumala wiilimaleliha vanceene, iliinya khasinitthuneya tho, vanceenexa ni olepa woophitaanya ileetera. Olepa woophitaanya ileetera okathi wunceene onnookhaliherya okhaliha itthu valiinyani, okhala wiira ileetera sootheene siri soophitaanyeya.

Nto ntoko onoona aa, iliinya saa sinirowa vathi sinoowerya okhala soolapuwa vakhaani; khahiyo soolapuwa vanceene ovikana. Kinitaphulela wiira, va siri soolapuwa vanceene, masi sihikhale sookhuveya vanceene. Mathowa a okhala sookhuveya mu nthoonyeryo nirina ahu va ti wiira ela ti enamuna ya ileetera yoopakiwa ni ekompyuta ntakhara opaka iliivuru ni emakina. Nave opaka eliivuru ni emakina khenikhala saana vakhala wiira ileetera sinnikhuruwa vasulu va eliinya mpakha eliinya ya vathi vaya. Eyo khenweryeya vaavo onipaka aa eliivuru ni emakina. Masi vakhala wiira onnilepa ni ntata, ti woonaneya wiira ennoweryeya.

Epaphelo ya wiilimaleliha 9