Ukubhala Okuhlanganisiweyo: Ukuqala

Ngiqala ibhuku leli ngicabanga ukuthi kawukafundi ukubhala ngesandla lakancane. Njalo loba ubukufundile, amakhono olawo kawayikufanana lalawo owadingayo ukuze ubhale ngokuhlanganisiweyo. Ukubhala okuhlanganisiweyo kutsho umbhalo ogijimayo, lapho izinhlamvu zihlanganiswa ngemigqa ethiwa yizihlanganisi, kumbe imigqa ehlanganisayo. Lokhu kutsho ukuthi ungabhala ngokuphangisa okukhulu ungaphakamisi ipeni lakho ephepheni, njalo lokho kulenzuzo ezisobala.

Kuyasiza njalo ekukhumbuleni lekufundeni amabala, ngoba izingqondo zethu zifunda ibala elihlanganisiweyo njengesigaxa esisodwa. Kodwa nxa sibhala ibala ngezinhlamvu ezehlukeneyo, ingqondo yethu kumele ihlanganise zonke lezo zinhlamvu, ibisisakha ibala, njalo lokhu empeleni kwenza ukuthi ukufunda kwethu amabala kuhambe kancane. Ngakho kuhle ukubhala ngokuhlanganisiweyo nxa ufuna ukuba ngumuntu ofunda ukucabanga kuhle sibili, ngokuphangisa okukhulu.

Umugqa Otshekileyo

Isifundo sokuqala empeleni yiso esinzima kakhulu. Konke esizakwenza yikudweba umugqa otshekileyo, njengomugqa otshekela phambili osekhibhodini yakho, kumbe umugqa otshekela phambili owubona ekuqaleni kwekheli lewebhusayithi. Kumele siyidwebe yonke ku-engeli efanayo njalo ngezikhala ezilinganayo.

Empeleni kunzima kakhulu ukukwenza, njalo abafundi abanengi bayahlupheka kakhulu ngakho. Kodwa nxa ungakwazi kuhle lokhu, usuqedile u-90% wokubhala okuhlanganisiweyo. Nxa kawukwazi, umbhalo wakho uzakhangeleka umubi kakhulu. Ngakho kufanele ukuchitha isikhathi esinengi, lamaphepha amanengi, udweba nje imigqa eminengi, eminengi kakhulu. Njalo sizakupha amaphepha okuzilolonga okwenza lokhu, leziqondiso zokuthi uhlole njani ukuthi ama-engeli akho alungile.

Asiqaleni.

Ekuqaleni, imigqa yethu etshekileyo sizayenza ibe lobude bemigqa emibili, ngakho ithatha imigqa emibili. Njalo nansi into ozayenza. Uzadweba umugqa ohambelana ngqo lomugqa osuvele usephepheni. Njalo sizazama ukwenza izikhala zilingane. Ngakho isikhala oqala ngaso yiso isikhala oqhubeka ngaso. Umugqa ngamunye kumele ube kude ngesikhala esifanayo lalowo ongaphambi kwawo.

Kangiyikukutshela ukuthi kumele isondelane kangakanani. Ingasondelani kakhulu, kodwa ngempela ingabi kude ukwedlula ububanzi bomunwe wakho omncane.

Ubusuyidweba kusukela phezulu kusiya phansi. Njalo uyidweba uzama ukuthi iqonde njalo ibe ku-engeli efanayo.

Ngemva kokudweba emine kumbe emihlanu, thatha irula uyibeke ephepheni uyihambise kulo lonke uhlu. Yibeke ihambisane lomugqa wokuqala, ubusuyihambisa ukhangele ukuthi yonke eminye iku-engeli efanayo yini.

Uzabona ukuthi abanye abantu bacina sebebhala ama-engeli ahlehlela emuva. Imigqa iqala ukutshekela emuva, kumbe iqala ukutshekela phambili kakhulu, kumbe imigqa iqala ukugoba. Lokhu kuzakwenzakala. Kuzathatha isikhathi ukuze ukwazi ukwenza uhlu lwemigqa emihle, eqondileyo, elezikhala ezilinganayo.

Lokhu kuqakatheke kakhulu, ngoba imigqa le etshekela phambili elezikhala ezilinganayo yiyo enika ukubhala okuhlanganisiweyo ubuhle bakho, njalo yiyo amathambo akho. Nxa kawukwazi ukuyilungisa khathesi, umbhalo wakho kawuyikukhangeleka kuhle loba nini.

Iphepha Lokuzilolonga 1

Ekhasini elilandelayo, sizanciphisa ubude bemigqa le etshekileyo bube ngobude bomugqa owodwa kuphela. Njalo sizaqhubeka.

Ngizatsho izinto ezimbalwa lapha. Okokuqala, umugqa wakho ungama mpo kakhulu kulowami, kumbe ungawela phambili kakhulu kulowami. Kodwa umugqa wakho kawukwazi, njalo kawumelanga, njalo kawuyikuze loba nini laphakade, uwele emuva. Lokho kakuvunyelwa. Kodwa ungawela phambili kakhulu. Nxa kunjalo, nxa ukhetha ukwenza imigqa yakho etshekileyo itsheke kakhulu, kumele yonke itsheke kakhulu, njalo kumele yonke ifanane. Ngakho loba ukutsheka kwakho kokuqala kunjani, yikho ukutsheka kwakho njengoba uqhubeka.

Kumele uhlole ngerula, njalo kumele ungazithetheleli lakancane. Imigqa yakho izaqala ukuntshintsha ukutsheka kwayo, ngoba ekuqaleni kawuyikukwazi ukuyigcina itsheka ngendlela efanayo kulo lonke uhlu; ngabafundi abambalwa kakhulu abakwaziyo. Ngakho ungalahli ithemba, ungadabuki, qhubeka nje ukwenza, ngoba ingqondo yakho izacina ifunde ukuthi kwenziwa njani. Kumele uqhubeke nje ukwenza ngesandla sakho langepeni lakho ephepheni.

Ngakho siyaqhubeka, njalo sizakwenza okungenani amakhasi amabili. Ngiyazi ukuthi uzacabanga ukuthi ngimubi, ngiqinile kakhulu, ngingothishela olukhuni kakhulu, njalo uzangizonda. Kodwa ekucineni, nxa umbhalo wakho usumuhle, uzaziqhenya kakhulu.

Ngakho nansi into ozayenza: uzagcwalisa amakhasi amabili ngemigqa etshekileyo, njalo uzayihlola ngerula yakho ukuze uqiniseke ukuthi yonke itshekela ngendlela efanayo. Njalo uzayihlola ngerula ukuze ubone ukuthi yonke ikude ngokulinganayo. Ngakho yonke itshekele ngokufanayo, njalo yonke ikude ngokulinganayo omunye lomunye.

Nguwe oqunga ukuthi izakuba kude kangakanani omunye komunye. Ungayisondelanisi kakhulu, ngoba uzabe uzidalela uhlupho wena ngokwakho. Ungayibeki kude kakhulu, ngoba uzabe ungazilolongi ngokwaneleyo. Njengoba ngitshilo, isikhala esikhulu kakhulu kumele sibe ngububanzi bomunwe wakho omncane, kodwa mhlawumbe kube yingxenye yalokho.

Ngakho khathesi sizakwenza lokhu ngobude bomugqa owodwa, njalo sizagcwalisa amakhasi amabili ngemigqa etshekileyo.

Iphepha Lokuzilolonga 2

Iphepha Lokuzilolonga 3